Hasanxon Yahyo Abdulmajid
MUSTAQILLIK ULUG‘ NE’MAT
Bugun bizning vazifamiz yurt mustaqilligini mustahkamlab, uni ko‘zqorachig‘iday asrab, Vatanni keyingi avlodga har jihatdan ozod, o‘z erkiga ega, o‘zligida sobit va emin holda qoldirishdir. Buning uchun har birimiz qo‘limizdan kelgan harakatni qilishimiz darkor.
MUSTAQILLIK ULUG‘ NE’MAT
Mustaqillik tushunchasi yakka shaxsga nisbatan ham, oilada ham, butun jamiyat miqyosida ham o‘z ixtiyori va iqtidoriga ega bo‘lishni anglatadi. Mustaqillik, ayrimlar tushunganidek, boshqalardan butkul ajrab olish yoki boshqani dushman tututish emas, balki o‘z ishlarida o‘zining inon-ixtiyoriga ega bo‘lish va boshqalar bilan tenglik asosida muomala qila olishdir. Kishi yoki jamiyatning o‘ziga tegishli hududda, o‘z mulkida emin-erkin tasarrufga ega bo‘lishi uning mustaqilligini anglatadi. Oqil va fitrati toza odam uchun hurriyatdan qadrli ne’mat bo‘lmasa kerak.
Yurtimizning qariyb bir yarim asrlik bosqindan so‘ng mustaqillikka erishishi chindan juda katta yutuq bo‘lgan. Bu o‘z-o‘zidan qo‘lga kirmagan. Bu yo‘lda qancha ajdodlarimiz jonu mollarini fido qilganlar, qanchadan-qancha erksevar yetakchilarimiz xalqni tutqunlik tafakkuridan ozod qilish yo‘lida muttasil zahmat chekkan, buning uchun har bir fursatdan unumli foydalangan. Ko‘plab ulamolarimiz, qori buvalarimiz yoshlarni istibdod iskanjasidan ozod, hur bo‘lishga o‘rgatgan. O‘zbekiston mustaqqiligi ortida ana shunday iymoniy harakatlar bisyor bo‘lgan. Xullas, xalqimizning umumiy irodasi bizga Vatan mustaqilligini tortiq qilgan.
Bugun bizning vazifamiz yurt mustaqilligini mustahkamlab, uni ko‘zqorachig‘iday asrab, Vatanni keyingi avlodga har jihatdan ozod, o‘z erkiga ega, o‘zligida sobit va emin holda qoldirishdir. Buning uchun har birimiz qo‘limizdan kelgan harakatni qilishimiz darkor.
Ilohim, mustaqilligimiz barqaror bo‘lsin!