Hasanxon Yahyo Abdulmajid
DUNYONING BUGUNGI YUZI
Bir bosqinchi birovning yeriga mehmon bo‘lib kelib, keyin ularning yurtini bosib olib, uylarini buzib, ayolu bolalarni qatliom qilmoqda.
DUNYONING BUGUNGI YUZI
Bir bosqinchi birovning yeriga mehmon bo‘lib kelib, keyin ularning yurtini bosib olib, uylarini buzib, ayolu bolalarni qatliom qilmoqda.
Ulardan biri bu qirg‘inni oqlab: «Biz odam suratidagi hayvonlar bilan jang qilyapmiz», deb baralla aytmoqda.
Yana biri: «Bizning askarlarga hech qanday qonun va ta’qiq yo‘q, ular istaganlarini qilishadi va buning uchun hech kimga javob berishmaydi», deb butun dunyoga e’lon qilib turibdi.
Qariyb 20 yillik qamaldagi xalqqa suv va tokni uzib, ularga hatto oziq-oqvat kelishini man qilib, ularni o‘z yerlarida ochiq osmon ostida zindonga tiqib bir chetdan qirmoqda.
Tinch aholi boshidan bomba yog‘dirib, ularni shaharning boshqa tarafiga ko‘chishlarini aytib, keyin ularni yo‘lda portlatib yubormoqda.
Asosan jarohatlangan ayol va bolalarga to‘la kasalxona ustidan bombalar tashlashdi. Harbiylardan biri ushbu hujumni muvaffaqiyatli uyushtirganlarini hech tortinmay e’lon qilib, o‘z sahifasida yozdi. Ortidan uning bir xo‘jayini chiqib, bombani o‘sha ayol va bolalarning otalari otganini da’vo qilib chiqdi. Shu payt to‘g‘ri xabarni bilmay yozib qo‘ygan zobit darhol o‘z yozganini o‘chirib, o‘zi otgan bomba haqida noto‘g‘ri ma’lumotga suyanib qolganini aytib, uzr so‘radi va xojasining so‘zini tasdiqlab qo‘ya qoldi.
Ularning kirdikorlarini ochib tashlayotgan matbuotlarga ayrim sekulyarlar tarafidan hujum bo‘lmoqda. Bira to‘la vijdonini yeb tashlagan OAVlar minglab odamlar o‘lgan portlash haqida «o‘nlab odam o‘lgani» haqida qo‘rqibgina xabar yozmoqda. Har narsaga musulmonni aybdor qilishga shoshadigan, yasama terrorchilarni chin musulmon deya talqin qilishga oshiqadigan va o‘zidan insonparvar yasab olgan islomofoblar esa mum yutgancha jim. Ha, nega bu xunrezliklar nimaning oqibatida ekanini aytib jar solmayapsiz?
Ayrim xalqlarning mazlumlarga yordam berish u yoqda tursin, ularning dodini eshitishga, bosqinni bosqin, terrorni terror deyishga majoli yo‘q. Dunyoga so‘z erkinligidan dars aytayotgan davlatlar bosqinchining ko‘r-ko‘rona tarafini olishdan tashqari ular haqida haqiqatni so‘zlashga yo‘l bermayotir. Qachon qarama inson huquqlaridan jar solayotgan hukmdorlar esa bosqinchining himoyasida kamarbasta.
Mana sizga bugungi insoniyat! Mana sizga inson huquqlari! Mana sizga so‘z erkinligi! Mana sizga zamonaviy dunyo! Mana sizga g‘arbona mezon! Mana sizga amerikacha hayot!
Ahvol shunday ekan, har bir xalq o‘z ehtiyotini qilishi kerak. Balandparvoz shiorlar, jimjimador gaplarga aldanmang! O‘z kuchingizga suyaning, o‘zgaga takya qilmang!
Yana bir haqiqat shuki, bularning barchasi din-diyonatsizlik va dunyo sevgisi oqibatidir. Dunyo muhabbati insonni ana shunday ko‘r qiladi. Moddiyatga berilish, faqat nafsu havoni hukmron qilish odamni ana shunday rasvo qiladi. Adolatsizlikka ko‘z yumish, yolg‘onchilik inson tabiatini shunday bulg‘aydi. Inson moddiy taraqqiyot bilan emas, boylik bilan emas, iymon bilan inson bo‘ladi. Moddiylashgan dunyo inson ruhiga baxt bera olmaydi.