Maqolalar

NOSHUKRLIK

Sizdan tortiq olib, o‘sha bilan mashg‘ul bo‘lib, sizga parvo qilmay ketgan odam sizga yoqmaydi. «Unga men emas, berganim shu ashyo muhim ekanda», deb undan ranjida bo‘lasiz. Agar bu ishni yosh bola qilsa, uni tushunishingiz mumkin. Ammo bolig‘ odamning bunday muomalasi sizni g‘azablantirishi tabiiy. Agar tortiq qilingan narsani o‘sha odam uchun atayin o‘zingiz yasagan bo‘lsangiz, uning tund munosabatidan g‘azabingiz yanada ortadi. Bordiyu tortiqni sinov uchun bergan bo‘lsangiz, oqibati yanada og‘ir. Berganingiz narsa emas, davomli va ko‘p taraflama manfaatli, yana ham katta e’tibor natijasi bo‘lgan mansab-martaba bo‘lsa-chi, u holda unga nisbatan yanada hassos bo‘lasiz, siz qilgan yaxshilikka yomonlik bilan javob qaytargan kishini aslo kechirmaysiz. Agar siz bunda uni imtihon qilishni nazarda tutgan bo‘lsangiz, jazo muqarrar. Nonko‘rlikning oqibati ayanchlidir.

Jismu jon, molu mansab, ko‘ngilxushi narsalar – bularning barchasi aslida Alloh taolo yo‘qdan bor qilgan va aynan Uning O‘zi sizga bergan ne’matlardir. Bu ne’matlardan foydalana turib, Egasini unitish esa xuddi sizdan hadya olib, sizdan yuz o‘girish kabi qabohatdir. Ne’mat beruvchini inkor qilish esa og‘ir jinoyat. Ne’matlarni ne’mat beruvchiga qarshi ishlatish qanday nonko‘rlik bo‘lishini esa o‘zingiz baholayvering. Ne’matlarni bergan Zot bir kun ularning hisobini olishi muqarrarligini ham ta’kidlagan. Bu esa masalani yanada jiddiylashtirishi aniq.