Hasanxon Yahyo Abdulmajid
SOVUQ ‒ SABR ‒ SAVOB
Sovuq ham azob turlaridan biri. Shuning uchun Qur’oni Karim jannat ahlining sharoitini vasf qilganda «Ular u yerda quyosh ham, ayoz ham ko‘rmaydilar», deydi (Inson surasi).
SOVUQ ‒ SABR ‒ SAVOB
Sovuq ham azob turlaridan biri. Shuning uchun Qur’oni Karim jannat ahlining sharoitini vasf qilganda «Ular u yerda quyosh ham, ayoz ham ko‘rmaydilar», deydi (Inson surasi).
Inson haroratli bo‘lgani uchun ancha‑muncha issiqqa chidashi, issiqdan himoyalanishi osonroq. Ammo sovuqqa nisbatan chidam va chora topishi qiyin ekan.
Hadisi shariflarda aytilganidek, insonga birorta tikan Allohning iznisiz kirmasligi va behudaga ketmasligini inobatga olsak, biz sovuqqa ham qaysidir darajada sabr qilishimiz kerak. Agar biz bunda to‘g‘ri yo‘l tutsak, savob kasb etamiz.
Hech o‘ylab ko‘rganmisiz, siz bilan biz mo‘minlar qishdagi sovuq ortidan ham gunohlarimizga kafforot, Allohning huzurida daraja va ajr topishimiz mumkin. Buning uchun biz e’tiqodni rostlab, sabr qila olishimiz kerak.
Sabrni ko‘pchilik noto‘g‘ri tushunadi. Sabrni har qanday holatda ham tek chidab o‘tirish deb o‘ylashadi. Shuning uchun sabrdan gapirilsa, darg‘azab bo‘lib, so‘kinishga ham o‘tib ketishadi. Bu ham aslida sabrni to‘g‘ri anglamaganlikdan. Yo‘q, sabr har ishga indamay tek turish emas, balki sabr ‒ bor imkoniyatni to‘g‘ri ishga solgach, qurbi yetmagan joyda chidam ko‘rsatish, afg‘on chekmaslikdir. Banda aqlu quvvat yetganicha qo‘lidan kelganini qiladi, natija esa Allohdan, o‘shanga qanoat va sabr qiladi. Ammo loqaydlik, yalqovlik bilan noqulaylikda yashash sabrlilik deyilmaydi.
Harakatingizga natijani Alloh bergani uchun unga sabr qilishingizda ajru savob bor. Biroq, Alloh bandaga topshirib qo‘ygan sabablarni qo‘llamay turib sabrni da’vo qilish Alloh taologa nisbatan kufronalik hisoblanadi.
Kishi iymonda bo‘lsa, tortgan mashaqqatiga Allohning huzurida ajr bor. Ammo mo‘min kishi ushbu vaziyatda niyati va umidi bilan ko‘proq savobu darajaga ega bo‘lishi mumkin. Buning uchun har bir holatni Alloh taolodan deb bilib, sabr bilan savob umid qilishi darkor.
Imom Muslim Suhayb roziyallohu anhudan rivoyat qiladi:
«Rasululloh sollallohu alayhi vasallam shunday dedilar: «Mo‘minning ishi ajoyib-da! Har bir ish uning uchun yaxshilikdir. Bu narsa faqat mo‘mingagina xosdir. Unga xursandchilik yetsa, shukr qiladi va bu uning uchun yaxshilik bo‘ladi. Unga tanglik yetsa, sabr qiladi va bu ham uning uchun yaxshilik bo‘ladi».
Keling, azizlar, ushbu sovuqlarda sabr etib, savob umid qilaylik. Zero, ob‑havo ham, unga nisabatan insonning zaifligi ham, ko‘rgan choralarimiz natijasi ham Allohdandir. Istasak‑istamasak shu qiyinchiliklarni boshdan o‘tkazyapmiz, buni iymon bilan qarshi olib, sabr bilan, Allohdan yaxshilik umidida yengib o‘taylik, toki tortgan mashaqqatimiz behuda ketmasin, Robbimiz huzurida maqom, oxiratga zaxira bo‘lsin. Alloh sabrlilar bilan birgadir.
(Maqola «o‘zingga ravo ko‘rgan narsani boshqaga ham ilin», degan g‘oya turtkisi bilan bitildi)