Maqolalar

VATAN HIMOYASI MUBORAK!

Vatanimizni sarhadlarda va yurt ichida turib himoya qilib turgan barcha yurtdoshlarimizni, xususan, chegarachilarimizni avvalo ushbu sharafli xizmat bilan, qolaversa, 14 yanvar Vatan himoyachilari kuni bilan muborakbod etaman. Alloh taolo qadamlarini sobit, qalblarini dovchi, tonu jonlarini omonda aylasin.

Vatan himoyachilarini bayramlari bilan tabriklar ekanman, aslida ularni ushbu sharafli xizmat bilan muborakbod etish darkorligi yodimga tushadi. Zero, ushbu sharafli xizmatning dinimizda tutgan o‘rni juda ham katta. Fursatdan foydalanib, bu borada kelgan ayrim hadislarni eslasam.

عَنْ سَهْلِ بْنِ سَعْدٍ السَّاعِدِيِّ رضي الله عنه أَنَّ رَسُولَ اللهِ صلى الله عليه وسلم قَالَ: «رِبَاطُ يَوْمٍ فِي سَبِيلِ اللهِ خَيْرٌ مِنَ الدُّنْيَا وَمَا عَلَيْهَا، وَمَوْضِعُ سَوْطِ أَحَدِكُمْ مِنَ الْجَنَّةِ خَيْرٌ مِنَ الدُّنْيَا وَمَا عَلَيْهَا».

Sahl ibn Sa’d Soidiy roziyallohu anhudan rivoyat qilinadi:
«Rasululloh sollallohu alayhi vasallam: «Alloh yo‘lida bir kunlik murobitlik dunyo va undagi narsalardan yaxshidir. Jannatning qamchingizchalik joyi dunyo va undagi narsalardan yaxshidir», dedilar».
Buxoriy va Muslim rivoyat qilgan.

Murobitlik – chegara qo‘riqlashdir. Ya’ni bir kunlik chegara qo‘riqchiligi dunyo va undagi narsalarga ega bo‘lishdan va ega bo‘lgach, ularni Allohning yo‘lida sadaqa qilgan yaxshi ekan.

عن ابن عباسٍ - رضي الله عنهما - قال: سمعتُ رسولَ الله - صلى الله عليه وسلم - يقول: «عينانِ لا تمسُّهما النار: عينٌ بكَت من خشية الله، وعينٌ باتَت تحرُسُ في سبيل الله» (رواه الترمذي بإسنادٍ صحيح).

Ibn Abbos roziyallohu anhudan rivoyat qilinadi:
«Rasululloh sollallohu alayhi vasallamning shunday deyayotganlarini eshitdim:
«Ikkita ko‘zga o‘t tegmaydi: Allohdan qo‘rqib yig‘lagan ko‘z, Allohning yo‘lida qo‘riqchilik qilib bedor bo‘lgan ko‘z».
Termiziy sahih sanad bilan rivoyat qilgan.

عَنْ سَلْمَانَ رضي الله عنه قَالَ: سَمِعْتُ رَسُولَ اللهِ صلى الله عليه وسلم يَقُولُ: «رِبَاطُ يَوْمٍ وَلَيْلَةٍ خَيْرٌ مِنْ صِيَامِ شَهْرٍ وَقِيَامِهِ، وَإِنْ مَاتَ جَرَى عَلَيْهِ عَمَلُهُ الَّذِي كَانَ يَعْمَلُهُ، وَأُجْرِيَ عَلَيْهِ رِزْقُهُ، وَأَمِنَ الْفَتَّانَ».

Salmon roziyallohu anhudan rivoyat qilinadi:
«Rasululloh sollallohu alayhi vasallamning shunday deyayotganlarini eshitdim: «Bir kecha-kunduz murobitlik qilish bir oy ro‘za tutish va bedor bo‘lishdan yaxshidir. Agar u o‘lsa, qilib yurgan amali davom etaveradi, rizqi unga yetib turadi va (qabrdagi) sinovchidan omonda bo‘ladi».

«Bir oylik ro‘za tutish» deganda nafl ro‘za nazarda tutilgan, chunki farz ro‘zaning o‘rnini boshqa hech bir amal bosa olmaydi. «Amali davom etaveradi» degani vafotidan keyin ham unga hayotlik paytida qilib yurgan amallari uchun ajr-savob yozilib turaveradi degani. Ya’ni murobitlik sadaqai joriyalardan hisoblanadi. «Rizqi yetib turadi» deganda jannatda shahidlarga qiyomatgacha berib turiladigan rizq nazarda tutilgan. «Sinovchi» – qabrda so‘roq qiluvchi va azob beruvchi farishtalardir.

Ha, xalqini, musulmonlarni xavf-xatardan omonda, xotirjam yashashlari uchun hayotini baxsh etish ana shunday ulug‘ savobli, sharafli amal bo‘lib, Alloh taoloning nazdida ibodat sanaladi. Sharti – ushbu ishni qilayotgan kishi iymonda bo‘lishi va niyati xolis, Allohdan savob umidida bo‘lishi lozim.

Shu bilan birga, yurtning ma’naviy sarhadlarini qo‘riqlayotgan azizlarimizni ham chinakam yurt himoyachilari deb bilishimiz kerak. Zero, zamonaviy dunyoda xalqlarni aynan ma’naviy chegaralarini buzib o‘tish orqali bosib olish avj olgan. Ularni ham bugungi bayram bilan muborakbod etaman.