Hasanxon Yahyo Abdulmajid
BOQIYLIK ALLOHGA XOS
Bu gulshan ichraki yo‘qdir baqo guliga sabot, Ajab saodat erur qolsa yaxshiliq bila ot. Alisher Navoiy
BOQIYLIK ALLOHGA XOS
Bu gulshan ichraki yo‘qdir baqo guliga sabot,
Ajab saodat erur qolsa yaxshiliq bila ot.
Alisher Navoiy
Bu dunyoda hech narsa va hech kim boqiy emas, hammasi o‘tkinchi. Ammo dunyoda yashab erishiladigan saodat yaxshi nom qolishidir. Yaxshi nom qolishi deganda odamlarning shunchaki maqtovini tushunmaslik kerak. Bu yerda bandalarning Alloh taolo huzuridagi guvohligi nazarda tutiladi.
Ustoz Yorqinjon domlamiz qisqa umr ko‘rgan bo‘lsa‑da, ana shunday yaxshi nom qoldirib ketdilar. Buni bugun har bir qalbi ochiq, dili pok odam ko‘rib turibdi. Zotan, domla chin ma’noda rabboniy olimlardan edi.
Kechadan beri qalbda bir fikr aylanmoqda. Yorqinjon domla bir necha yildirki yopiq xazinadek yashab keldi. Shu o‘tgan ramazon oyida bu xazinaga kichik bir tirqich ochilgandek bo‘ldi: masjidda ilmiy suhbatlarni boshladilar, xalqimiz bundan bahrmand bo‘lib, asta mazasini bilib bormoqda edi. Ochig‘ini aytganda, u kishi masjidda xizmat qilishga ko‘pchiligimizdan ko‘ra haqliroq edi. Biroq, umr bakor kelmadi, ko‘p narsaga ulgirmadi, Allohning irodasi ekan... Ammo u kishining masjid orqali xizmatlari bardavom bo‘lishini dil istardi. Ushbu istakka yupanch sifatida bir fikr: alhamdu lilloh, hozirda yurtimizda yangi masjidlar qurilishiga kengliklar bo‘lib turibdi, Qo‘qon shahrida Yorqinjon domla nomida bir masjid bino qilinsa, qanday bo‘larkin? Menimcha, domla bunga haqli. Axir u kishi shu zamonda Qo‘qonning faxru sharafi edi. Shoyad bu ish marhumimizning ilmga qilgan xizmatlariga bir tuhfa, elga yetkazmoqchi bo‘lgan yaxshiliklari o‘rniga o‘rinbosar bo‘lib, u kishiga savoblar yetishiga bois bo‘lsa. Ikkinchi tarafdan bu tadbir domlaning ilmidan bahra olib, u kishiga biror xizmat taqdim qilmoqchi bo‘lgan muxlislarga ham bir imkoniyat, yupanch, u kishiga muhib bo‘lganlarga taskini xotir bo‘ladi. Qolaversa, bu ish olimimizga keragicha e’tibor bera olmaganimizga ham kafforot bo‘lsa, ajabmas.
Qo‘qonda ham, boshqa joylarda ham domlaga muxlis, diniga muhabbatli kishilar ko‘p, ular bu xizmatni mamnuniyat bilan bajarishlari aniq. Hammalari ham domlaga nimadir xizmat qilish istagida. Quruq gap‑so‘z, yig‘i‑sig‘i bilan cheklanmay, amaliy ish ham bo‘ladi. Balki kelajakda bu masjid elga ilm ziyosini taratadigan muborak maskanlardan biri bo‘lar.
Domla o‘zidan yaxshi nom qoldirdi, endi bu nomni mustahkamlash qolgan muxlislar, shogirdlar, mo‘minlarning vazifasidir. Buning eng yaxshi yo‘llaridan biri u kishining nomidan sadaqai joriya qilishdir.