Maqolalar

JINSIY TARBIYANING O‘Z VAQTI VA USULI BOR

Negadir ayrim rahbarlar boshqa sayyorada yashayotganga o‘xshaydi. O‘zi shunaqami yoki menga shunday tuyuladimi, bilmadim. Ular xalqdan shunchalar uzoqki, odamlarni bir foiz ham hisobga olishmaydi. Bir xonaga qamalib olib qayerlardandir tarjima qilib olgan qarorlarini yurt ustida chiqaraverishadi. Shular goh goh xalqqa ham aralashib turishsa bo‘lardi, har qalay odamlar ustida hukm chiqarishga mas’ul ekanlarku...

Aslida ta’lim vazirligi mas’ullari xalqning, ya’ni bizning pulimizga ishlayotgan xodimlar hisoblanadi. Shunday ekan, ular xalqdan farzandlarini qanday tarbiyalab berishni so‘rashlari kerak emasmi? Hozir imkoniyatlar bemalol, xalqdan ovoz olish juda ham oson. Agar tushunmagan joyimiz bo‘lsa, ochiq bahs va ilmiy ta’lillar qilish mumkin. Faqat xalqning istagini bilishni, xalqqa chindan xizmat qilishni istashsa bas. Yoki ular bizning pulimizdan maosh olib, bolalarimizni o‘zlarining didlariga, xohishlariga yoxud birovlarning talablariga ko‘ra tarbiyalayverishadimi?

Nima emish, bog‘chadan boshlab jinsiy tarbiya darsi o‘tilarmish.

Hali jinsini aniq anglamagan bog‘cha bolasiga jinsiy tarbiyadan dars o‘tishni qanday tushunish mumkin?

O‘sha onaxon o‘zi bog‘cha yoshidagi nabiralarini o‘tirgizib olib ularga qanday dars o‘tishini bir ko‘rsatib bera olarmikin?

Biz ota onalarimizning yotog‘ini ham ko‘rmaganmiz, ko‘rsatishmagan. Bola sog‘lom o‘sishi uchun jinsini juda aniqlab berish shartmas, Xudoyim o‘zi nihoyatda chevarlik bilan yaratib qo‘ygan, o‘zi vaqti kelganda tushunib oladi.

Xo‘p, hozir zamon boshqacha, hammayoq ochilib yotibdi ekan, shundan diqqat ekanlar, buning davosi bo‘lgan diniy tarbiya va ta’lim bir chetda qolib, yana battar ochib berish, oldinroqdan, yaxshiroq ochib berish qanaqasiga to‘g‘ri bo‘ladi?

Ba’zan hayron qolaman. Shaharma shahar tana sotib yoki mardikor bo‘lib yurgan ayollar, ersiz sarson xotinlar, axloqsiz qizlarining son sanoqsiz muammolaridan ko‘zini yumib olgan odamlarning bog‘cha bolalariga jinsiy tarbiyadan dars o‘tish tashvishini qilishlarini qanday tushunsa bo‘ladi?

Jinsiy tarbiya mavzusini ochiq qilgan jamiyatlarning holatini o‘rganib ko‘rganmikin bular? Ular shu bilan nima natijaga erishib, nima karomat ko‘rsatishibdi, bir ko‘raylik?

Qiziq. O‘zlari maktabda o‘g‘il qiz qilib raqsga tushirishadi, voyaga yetgan yigit qizlarni bir joyga qo‘yishadi, yana jinsiy aloqani o‘rgatishadida, keyin maktabda homilador bo‘lib qolishyapti, deb yozg‘irishadi. Uning o‘rniga ta’limni isloh qilsa, tarbiya berishni o‘rganishsa bo‘lmaydimi?

Aql to‘lmay turib jinsiy maylni uyg‘otish juda yomon oqibatlarga, axloqsizliklarga, kasallik va hatto o‘z joniga qasd qilishlarga olib keladi. Bu mavzu haqida so‘zlashning o‘z vaqti va uslubi bor, faqat bu musulmoncha usul, g‘arbcha emas. Agar o‘zbekman, xalq uchun ishlayman deyishsa, shuni o‘rganib, zamon ruhida tatbiq etishlari lozim.

Buning uchun birinchi o‘rinda erkak va ayol bir xil emas, boshqa boshqa mavjudot ekanini tan olish kerak. Ularning xususiyatlari va farqlarini to‘g‘ri anglay bilish kerak. (Bo‘lmasa, marhamat qilib bashariyatni o‘zlari istagandek boshqatdan yaratishsin, balki bira to‘la faqat bir jinsli qilib yaratishar.) Qanaqadir chaynalgan safsatalar, xayoliy tengliklar haqidagi soxta qarashlardan voz kechish kerak. Ikki jins o‘rtasida o‘rni kelganda masofa ushlash lozim. Bo‘lmasa, shunaqa chuqurga qarab ketaverishga to‘g‘ri keladi va buning oxiri halokat...

Makatablarda o‘zi ta’lim haminqadar, ko‘p joyda umuman yaroqsiz, odob yo‘q, milliylik yo‘q, tarbiya yo‘q, diyonat yo‘q, maktab atrofida kimligi, nimaligi noma’lum atala yoshlarni ko‘rib har doim odam achinib ketadi... U musulmonmi, dinsizmi, o‘zbekmi, o‘risimi, o‘g‘ilmi, qizmi, o‘zi ham bilmaydi...

Buning o‘rniga odob axloq, hayo iffat, din diyonatni o‘rgatsa bo‘lmaydimi? Agar yoshlarning internetdan noto‘g‘ri ma’lumot olishi xavfi bo‘lsa, uni saralay olishlari uchun dinu axloq mezonlari o‘rgatilsa bo‘lmaydimi?  

Yana bir qiziq savol tug‘iladi: Diniy ta’lim berilsa, maktab diniylashib qoladigan bo‘lsa, jinsiy tarbiya o‘rgatilsa, unda maktabni nima deb atash mumkin bo‘ladi? U qanday dargoh bo‘lib qoladi?

Jinsiy tarbiya borasida dinimizda va ming yillik tariximizda yetarli tajriba, ta’lim bor. Uni zamonga moslab, o‘z vaqtida o‘rgatilsa bas, muammo hal bo‘ladi. Faqat buning uchun o‘z qadryatlaridan begonalik, o‘zlikdan qochish, g‘arbparastlik bo‘lmasligi kerak..