«BIZ QILIB YURGAN AMALLARINGIZDAN NUSXA OLIB QO‘YGAN EDIK»
Hasanxon Yahyo Abdulmajid
Bugun ijtimoiy sahifalar yoki birov bilan qilgan shaxsiy yozishmalardagi bitiklarimizdan kimlardir nusxa olib, o‘rni kelganda uni bizga qarshi ishlatadigan bo‘lsa, bundan juda ham noqulay holatga tushib, vaqti kelsa, qattiq darg‘azab bo‘lib, o‘ch olishga kirishmoqdamiz.
«BIZ QILIB YURGAN AMALLARINGIZDAN NUSXA OLIB QO‘YGAN EDIK»
Bugun ijtimoiy sahifalar yoki birov bilan qilgan shaxsiy yozishmalardagi bitiklarimizdan kimlardir nusxa olib, o‘rni kelganda uni bizga qarshi ishlatadigan bo‘lsa, bundan juda ham noqulay holatga tushib, vaqti kelsa, qattiq darg‘azab bo‘lib, o‘ch olishga kirishmoqdamiz.
Aslida bu olingan nusxalar hech narsa emas, bugun bor, ertaga yo‘q bo‘lishi mumkin. Har qancha esda qolarli bo‘lmasin, vaqt o‘tishi bilan insonlar unutishi ham bor. Qolaversa, odamlar nusxa olganlari xamir uchidan patir, xolos, birovning nazariga tushmagan bitiklarimiz son‑sanoqsiz. Biroq, bizning har bir yozganimizni hech bir istisnosiz kuzatib, nusxasini bexato saqlab borayotgan farishtalar borki, ularning nusxalari hech qachon o‘chmaydi va amal daftarlarimizda bekamu ko‘st namoyon bo‘ladi.
Alloh taolo aytadi:
«Har bir ummatni tiz cho‘kkan holida ko‘rasan. Har bir ummat o‘z nomai a’moliga chaqiriladi: «Bugungi kunda qilib yurgan amallaringizning jazo mukofotini olasiz. Mana bu kitobimiz sizga haqiqatni aytib beradi. Biz qilib yurgan amallaringizdan nusxa olib qo‘ygan edik» (Josiya surasi, 28, 29‑oyatlar).
Og‘izdan chiqqan har bir narsani yozayotgan, amallarimizdan nusxa olayotgan farishtalar ijtimoiy tarmoqlardagi bitiklarni ham hisoblab, qaydlab borishmoqda. Qiyomat kuni ular olgan nusxalarni qo‘lingizga tashlashlari aniq. U paytda bugungidek o‘zingizni yashirib, issiq joyda hotirjam yonboshlab o‘tirgan bo‘lmaysiz, balki butun bashariyat oldida, dahshatdan cho‘kkalab, birov haqqini da’vo qilib kelib qolmasaydi, degan xavotir qurshovida zir titrab turgan bo‘lasiz. Bu holat har bir ummatning boshida bordir. Jinoyatchilar: «Voy, sho‘rimiz qurisin. Bu qanday kitobki, kichikni ham, kattani ham hech qo‘ymay hisob qilibdi-ya!» deya hayqirishadi. O‘sha soatda o‘z bitiklaringizni qanday topishni istasangiz, bugun shunga qarab ish qiling. U kunda bugungi oqlovlar, haqoratlab qochishlar, masxarabozliklar o‘tmaydi va hech bir jon boshqaning yukini zimmaga olmaydi. U kunda hisobi eng og‘ir amal birovning sha’nida qilingan tajovuz bo‘ladi.
Allohim, o‘sha Kunda ‒ «Biz qilib yurgan amallaringizdan nusxa olib qo‘ygan edik», deyilgan soatda najot topadiganlardan bo‘lishimizni nasib aylagin!