Maqolalar

GO‘ZAL XULQLI VA DIYONATLI INSON EDILAR

Ushbu yilni "mahzunlik yili", "judolik yili" deb atalsa ham, xato bo‘lmasa kerak. Juda ko‘p ahli ilm, ahli fazl kishilarimizdan judo bo‘ldik. Kecha eng aziz insonlarimizdan biri Shuhrat Qayumov hoji og‘amizdan ham ayrildik.

Shuhrat hoji aka juda ham ajoyib va halim inson edilar. Qur’onga muhabbatlari o‘zgacha edi. U kishini uzoqdan tanir edigu, Qur’on o‘qishga bo‘lgan ishtiyoqlari va mahoratlaridan bexabar ekanmiz. Bundan 15 yilcha muqaddam bir joyda ko‘rishib qoldik. Shams surasini ustozga topshirayotgan ekanlar. Juda ham raso va yaxshigina tajvid bilan o‘qib berdilar. To‘g‘risi, bag‘oyat hayratda qoldim. U kishining sohasi, atrof muhiti va o‘sha paytlardagi vaziyatni e’tiborga olinsa, bu qanchalar katta jasorat ekanini anglash qiyin emas.

Keyinchalik juda ham qadrdon bo‘lib ketdik. Oliy ma’hadda o‘qiyotganimizda nutq madaniyatidan dars o‘tdilar. Shu mavzuda u kishidan ko‘p narsa o‘rganganmiz va xatoba bo‘yicha fikrlarimiz hamohang edi. U kishi ko‘plab ahli ilmlarga shu jihatdan ustoz edilar.

Shuhrat hoji aka dinini tutgan, atrofidagi juda ko‘p kishilar, hamkasblarining namoz niyoziga sabab bo‘lgan, ahli ilmlar bilan qadrdon, olimlarga muxlis, iymoniga sadoqatli, axloqi go‘zal, odob go‘zal, shirinso‘z, oliyjanob  inson edilar. Suxandon va xonandalar orasida u kishidek taqvoli, muxlis kishini boshqa bilmaymiz. Ana shunday noyob insonimizdan ayrildik.

Shuhrat hoji og‘amiz diniy mavzulardagi she’r va maqolalarni o‘qishga haris edilar. Oxirgi paytlarda Qur’on suralarining tafsirini o‘qib berishga kirishgan ekanlar. Fotiha surasining tafsirini o‘qib bergach, surani o‘zlari qiroat qilibdilar. Keyin shu videoni menga ham yuborib, "Ko‘ringchi, qiroatda xatoyim yo‘qmikin? Yoki qorilarga o‘qitsakmikin?" deb so‘radilar. Men: "Hoji aka, qiroatingiz nihoyatda yaxshi, boshqa qori o‘qishiga hecham hojat yo‘q. Qolaversa, qorilarning qiroati ko‘p, ammo siz kabi Qu’on o‘qiyidigan boshqa suxandon bormi? Yo‘q, o‘shaning uchun o‘zingiznig o‘qiganingiz har jihatdan yaxshi, qalbi ochiqlarga ibrat", deb aytdim. U kishi bundan qanoat hosil qilgandek bo‘ldilar.

Shuhrat Qayumov ahli ilmlarga yondosh yurar edilar. Ustozimiz Shayx hazratlariga o‘zgacha ixlosmand edilar. O‘rtalaridagi o‘zaro muhabbat va ishonch nihoyatda yuqori edi. Muftiy hazratlari bilan ham juda yaqin, boshqa ustozlar bilan ham qadrdon edilar. Shuhrat va martabada yuksakligi, o‘z sohasida yuqori maqomga ega bo‘lish bilan birga, juda ham kichikko‘ngil, kamtarin inson edilar. Diniy idorada bo‘ladimi, "Hilol nashr"da bo‘ladimi, qanday tadbirni o‘tkazib berish iltimos qilinsa, so‘zsiz qabul qilardilar va juda ham go‘zal shaklda o‘ktazib berardilar.

Bir necha bor Respublika Qur’on musobaqalarida suxandonlik qilganlar. 2018 yilgi Qur’on musobaqasining respublika bosqichini o‘tkazishda ham bizga juda katta ko‘mak bo‘lgandilar. Musobaqadan oldin qorilarga trenning dars o‘tib berdilar va kechgacha qorilarga o‘z sohalari bo‘yicha ta’lim berishdan charchmadilar. Musobaqaning ko‘tarinki ruhda, saviyada o‘tishida u kishining xizmatlari katta bo‘lgan. U kishi bilan ishlash juda ham qulay va maroqli edi. Sababi maomalasi oson, zakiy kishi edilar.

Oxirgi marotaba birga o‘tkazgan tadbirimiz "Shayx Muhammad Sodiq Muhammad Yusuf" jome masjidida tashkil qilingan mavlid marosimi bo‘ldi. O‘shanda u kishi bu tadbirni shunday yuqori saviyada va juda ham maroqli o‘tishida asosiy shaxs, mehvar bo‘lgan edilar. U kishidan tadbirni o‘tkazib berishlarini iltimos qilib telefon qilganimda: "Rasululloh sollallohu alayhi vasallamga bag‘ishlangan tadbirda xizmat qilish bizga sharaf ku", degan gaplari xotiramga mixlanib qolgan.

Ko‘pchilik guvoh bo‘ldi,  o‘sha mavlid yig‘ini 4,5 soat davom etishiga qaramay, hech kim zerikmadi ham, charchamadi ham. Tadbirda u kishi tarafidan o‘qib berilgan Rasulimizga muhabbat xususidagi, Hasan degan bolaning hikoyasi majlisning eng yuqori nuqtasi bo‘ldi, yig‘lamagan odam qolmadi. Ushbu maqola haqida tadbirdan oldin maslahatlashar ekanmiz, u kishi maqolani maqtab: "Necha marta o‘qisam ham har safar yig‘lab yuboryapman", deb qoldilar. Men o‘zimcha: "Hoji aka, ko‘p o‘qivormang, yana tadbirda hikoya o‘zingiz uchun oddiy bo‘lib qolmasin, tarovati ketib", deb hazil qilsam, u kishi: "O‘n marta o‘qisam ham birinchisidek yig‘i kelyapti, shuncha yil yashab bunday ta’sirli hikoya o‘qimagandim, unday bo‘lmaydi, inshoolloh", degandilar.  Haqiqatan, tadbirda ham yig‘ladilar va yig‘latdilar.

U kishining Rasululloh alayhissalomga bo‘lgan muhabbatlari o‘zgacha edi. Bir necha yil oldin doktorlar u kishiga bemorliklari biroz xavfli ekanini aytganda, Madinai Munavvaraga ko‘chib bordilar va o‘sha joyda vafot etishni qasd qilgandilar. Ammo Alloh dardlariga shifo berib, qaytib kelgandilar. Biroq, umrlari qisqa ekan, bugun boqiy hayot sari rehlat qildilar.

Hoji og‘amiz haqlarida so‘zlasak, juda ko‘p gapirish mumkin. Fazilatlari, maqtovli xislatlari bisyor edi. Muhimi u kishi

muxlis mo‘min va go‘zal xulq sohibi edilar. Rasulimiz alayhissalom: "Qiyomat kuni menga eng yaqiningiz xulqi go‘zal bo‘lganingizdir", deganlar. Ilohim, muhabbat va axloqlarining mukofoti o‘laroq, ushbu maqom marhumimizga ham nasib bo‘lsin.

Qalblar mahzun, ko‘zlarda yosh, ammo tillar faqat Robbimizga manzur so‘zlar bilan cheklangay.

Allohim, Shuhrat hoji og‘amizni rahmatingga ol, kamchiliklarini afv qil, u kishini anbiyolar, solihlar, siddiqlar, shahidlar bilan birga ayla, mahbublari Nabiyyimizning shafoatlari, visollariga musharraf qil, bizlarning haqlarida qilayotgan duolarimizni ijobat et va bizlarga xayri xalaf ber.

Bu ayriliqda musibatga uchragan barcha azizlarimizga chin dildan ta’ziya bildiraman. Allohim ularga sabri jamil bersin va sabrlariga ajri azim ato etsin.

Baqo Allohga xos. Barchamiz Allohning mulkimiz va U Zotga qaytamiz.