Hasanxon Yahyo Abdulmajid
MUSTAQILLIK BAYRAMI
Mustaqillik hurlik, ozodlik ramzi. Ayniqsa, bizga nisbatan olganda, dinsiz tuzum va dinsiz o‘zga xalqqa tobelikdan qutilganlik shodiyonasi, erkimiz o‘zimizga qaytgan on. Hurlikni hurriyatsevar hurfikrlar sevadi va qadrlaydi. Erkni esa erksevarlar his qiladi. Qaramlikka moyil kimsalar bu ne’matlardan bebahradir.
MUSTAQILLIK BAYRAMI
Mustaqillik hurlik, ozodlik ramzi. Ayniqsa, bizga nisbatan olganda, dinsiz tuzum va dinsiz o‘zga xalqqa tobelikdan qutilganlik shodiyonasi, erkimiz o‘zimizga qaytgan on. Hurlikni hurriyatsevar hurfikrlar sevadi va qadrlaydi. Erkni esa erksevarlar his qiladi. Qaramlikka moyil kimsalar bu ne’matlardan bebahradir.
Ayrim kishilar mustaqillikni musulmon olamidan ajrab olish degan gumonda bo‘lib, bu bayramga tund munosbatda bo‘ladi. Yana kimlardir mustaqillik davrida ko‘rgan qiyinchiliklariga mustaqillikni aybdor deb ko‘radi. Chuqurroq tafakkur qilinsa, ikkala tushuncha ham o‘rinsiz. Sababi biz ruslarga qaramlikdan mustaqil bo‘lganimizni nishonlaymiz. Kimdir noningizni yedirish o‘rniga u bilan boshingizga ursa, nonda nima ayb?
Aka uka yonma yon uy solsa, o‘rtaga devor uradi. Qo‘shningiz sizdan alohida bo‘lib, chegaralansa, siz ham chegara qurasiz. Har kim o‘zining mustaqil uyi, daxlsiz makoni bo‘lishini istaydi, shuning uchun ommaviy yashash joylarini odamlar suymaydi. Bularning barchasi tabbiy hol. Ammo do‘stlik, birodarlik, iymon rishtalari, qarindoshlik, qo‘shnilik aloqalari o‘z me’yo’rida davom etishi lozim.
Tarixga nazar solinsa, Islom ummati ikkinchi hijriy asrdanoq mustaqil davlatlarga asos sola boshlagan va mustaqil hududlarda yashab kelgan. Bunda ular siyosiy, harbiy va iqtisodiy jihatdan ayri bo‘lgan, boshqacha qilib aytganda, hukmronlari boshqa boshqa bo‘lgan, ammo e’tiqod va maqsad bir bo‘lgan, birodarlik rishtalari, ilmiy harakatlarda bir yurtda yashagandek aloqada bo‘lishgan. Aytmoqchimizki, musulmonlar siyosiy jihatdan mustaqil yurtlarda yashasalarda, ularni iymon rishtasi hamisha bog‘lab kelgan. Binobarin, yurtlarning siyosiy mustaqilligini to‘g‘ri anglay bilish lozim. Bundan kulfat yasashga hojat yo‘q.
Yurtimiz siyosiy qaramlikdan ozod bo‘lgan ekan, ilohim, bu mustaqilligimiz chin, mustahkam bo‘lsin va mafkuramizda hur, mustabid tuzum chirklaridan butkul pok bo‘lishini Allohim muyassar aylasin.
Barcha erksevar, yurtsevar vatandoshlarga ushbu ozodlikkka erishganimizning 30 yillik bayrami qutlug‘ bo‘lsin!