Hasanxon Yahyo Abdulmajid
TA’ZIYA
Bugun O‘zbekiston musulmonlari, xususan, ahli Qur’onlari og‘ir judolikka uchradi. Namangan shahrida tug‘ilib, tabarruk yoshga yetib, butun umrini Qur’on xizmatiga bag‘ishlagan Muhsinjon qori pochcha Hasanxon qori o‘g‘li olamdan o‘tdilar. U kishi og‘ir yillarda ham, har qanday qiyin vaziyatda ham Qur’on ta’limini to‘xtatmadilar va yuzlab qorilarni yetishtirishga erishdilar.
TA’ZIYA
Ulug‘ ustozdan ayrildik
Bugun O‘zbekiston musulmonlari, xususan, ahli Qur’onlari og‘ir judolikka uchradi. Namangan shahrida tug‘ilib, tabarruk yoshga yetib, butun umrini Qur’on xizmatiga bag‘ishlagan Muhsinjon qori pochcha Hasanxon qori o‘g‘li olamdan o‘tdilar. U kishi og‘ir yillarda ham, har qanday qiyin vaziyatda ham Qur’on ta’limini to‘xtatmadilar va yuzlab qorilarni yetishtirishga erishdilar.
Muhisonjon qori pocha yuksak xulqli, shirinsuxan, o‘ta kamtar va tavozeli, qadimgi ulamolarimiz madrasasining ta’limini olgan, dunyodan zuhd qilgan, o‘zini izhor qilishdan hamisha qochgan, o‘ta himmatli zot edilar. Suhbatlari juda ham maroqli, sermazmun edi. Yaqin tariximizga oid qimmatli ma’ulmotlarni ajoyib uslubda hikoya qilib berardilar. O‘ta kamtarliklaridan o‘zlarini past olib «Men chala qorimanda», deb qo‘yardilar. Bu ham bo‘lsa, ulug‘larimizning ixlos va nafs tarbiyasi yo‘lidagi uslublardandir. Ba’zan bilgan narsalarini ham xuddi bilmaydigandek so‘rar va izhori fazl bo‘lmasin uchun, bilgan narsalarini eshitsalar ham, bilmagandek tinglar edilar. Bu ham ulug‘larimizning suhbat odoblaridan hisoblanadi.
Qori dada juda ham ziyrak va iltifotli edilar. 2018 yil o‘tkazilgan Respublika Qur’on musobaqasida Namanganda ko‘plab ulug‘lar qatori u kishi ham musobaqa yakuniga keldilar. Odam juda ko‘p. Bir amallab u kishini ziyorat qildik. Tiqilishda kechgan muloqotdan ko‘ngillari to‘lmay qolgan ekan, o‘shandan keyin oldilariga borgan bir nechta kishidan kaminani so‘rab, ko‘pchilik ichida yaxshi ko‘risha olmadik, deb qayta‑qayta salom aytib yubordilar. Keyin «Qur’on ila hamnafas» nomi bilan yurtimizdagi Qur’on ustozlaridan olingan turkum suhbat munosabati bilan oldilariga ziyoratga bordik va betakror, go‘zal qiroatlarini videoga qayd etib, ommaga taqdim qilishga musharraf bo‘ldik. Video tasvirga suhbat qilib berishga ko‘nmadilar. Noiloj, qiroat va duolari bilan cheklandik. Undan juda ko‘pchilik bahramand bo‘ldi.
Muhsinjon qori pochchaning oila a’zolari va barcha yaqinlariga, xususan, yurtimizdagi Qur’on ahli va muhiblariga chin qalbdan chuqur ta’ziya izhor qilaman. Alloh taolo marhumimizni husni qabul aylasin, solih amallarining ajrini ko‘paytirsin, Qur’oni Karimga qilgan xazmatlari uchun O‘z fazlidan mukofotlar bilan siylasin, Qur’on shaofatiga noil aylasin. Allohim, musibatlarimizda ajr ber va yo‘qotganimiz o‘rniga xayri xalaf ato ayla.
Barchamiz Allohnikimiz va barchamin Unga qaytamiz